Franz Vittur pea do l pest Merit Ladin 2026 

L unerà ie stat l prim ntendënt de scola ladin. Na vita al servisc dla scola y dla cultura ladina. 

L segondo purtadëur dl Merit Ladin ie tler: la giuria de esperc se à pronunzià a una per l ex ntendënt dla scoles ladines, Franz Vittur. A ti sëurandé l pest sarà l assessëur per la Furmazion y Cultura ladina, Daniel Alfreider. La giuria de esperc fova metuda adum da André Comploi, diretëur dl Departimënt Scola y Cultura ladina, Irene Prinoth, diretëura dl Istitut Cultural Ladin Micurá de Rü, Katharina Moling, diretëura dl Museum Ladin Ciastel de Tor, Denni Dorigo, diretëur dl Istitut Cultural Ladin Cesa de Jan, y Paul Videsott, diretëur dla Sezion ladina dla Facultà de Scienzes dla Furmazion dla Università Liedia de Bulsan. 

Te si mutivazion auza la giuria de esperc ora: "Coche prim ntendënt ladin, te n mumënt storich dezisif, à Franz Vittur crià y svilupà inant la fundamëntes dl'istruzion ladina d'al didancuei. Cun vijion y costanza ti al dat la drëta direzion ala strutures dirigenzieles y aministratives dla scola ladina, y à defendù cun gran cunvinzion l model de scola paritetich, che vën al didancuei udù coche ejëmpl per l'istruzion plurilinguela a livel nternaziunel. Sëuraprò se al dat da fé te deplù manieres per renfurzé la rujeneda y la cultura ladina y à dat n cuntribut cuncret per la defendura di dërc dla mendranza ladina." 

L assessëur provinziel per la Furmazion y Cultura ladina, Daniel Alfreider, sotrissea: "Franz Vittur, cun si passa 50 ani de prejënza ativa tla istituzions de scola ladines, à reprejentà n pont de referimënt segur, fërm y cumpetënt per dut l mond dla istruzion y dla furmazion. Na persona ispireda, lezitënta y davierta, à Vittur for cris la streda dl dialogh y dla cunlaurazion, ne lascian mei do i valores dla unestà, dla prufesciunalità y dla inclujion. Sce la scola ladina ie al didancuei l'ana y la garanzia dl'identità y dla cultura de nosta cumenanza, ti va l majer merit dessegur a Vittur, a chël che ti sporje mi rengraziamënt y mi amirazion." 

"Franz Vittur ne à nia mé giaurì stredes nueves te si funzions prufesciuneles y istituzioneles, ma l à nce purtà pro ala vijibltà y ala valorisazion dla rujeneda ladina nce coche autëur y prutagonist culturel", njonta l diretëur dl Departimënt Scola y Cultura ladina André Comploi: "L pest recunësc la grandëza de si opra de vita y ulëssa vester tl medemo mumënt n ejëmpl y na sburdla per l mpëni al servisc dla furmazion, dla rujeneda y dla cultura ladina." 

Cuncors artistich Ert X Merit Ladin. L pest Merit Ladin ti vën sëurandat ufizialmënter a Franz Vittur tla forma de n documënt reprejentatif da pert dla Provinzia de Bulsan. Paralelamënter à la Lia di Artisć y dla artistes de Südtirol metù a jì l cuncors artistich Ert X Merit Ladin, n cunlaurazion cun la Direzion Scola y Cultura ladina. L'opra d'ert crissa ora da na giuria de esperc unirà prejenteda tl cheder dl Di dla cultura ladina ai 19 de setëmber, a Urtijëi, y sëurandata al unerà Franz Vittur. 

mac/tk