Archeologia tla Dolomites: libri y material archeologich

Legrëza cun i libri y l material didatich “Archeologia tla Dolomites“ dac ora dala Ntendënza y Cultura ladina.

La publicazion nueva data ora dala Ntendënza y Cultura ladina ie metuda adum da trëi libri respetivamënter sun l Tëmp dla piera, l Tëmp dl ram y dl bront y l Tëmp dl fier, che trata a na maniera aprufundida y scialdi deletëula la preistoria tla valedes ladines cun material didatich pratich y eserzizies per la lezions te scola. Pra i libri tochel nce cufri cun d’uni sort de material da pië ite cun la mans (p.ej. na piera da fuech, guant da tré sëura y n.i.). De gran valor ie l carater plurilinguel dla publicazion: al test prinzipel per tudësch ti iel unì njuntà tlarimënc y n glosser per talian, gherdëina y badiot. 

Pra la prejentazion tla scola elementera fovel nce presënt l Assessëur per la scola y la cultura ladina Daniel Alfreider che à sotrissà che “chësta publicazion ie n arichimënt per nosta scola ladina ajache l se trata dla prima de chësta sort y ti porta daujin l’archeologia ai sculeies y ala sculées a na maniera sperimentela ti dajan la puscibltà de fé esperimënc cuncrec y esperienzes pratiches te tlas y ti museums”. La manifestazion ie unida giaurida dala moderadëura y diretëura dl Ciamp pedagogich Maria Kostner che à mustrà si legrëza de pudëi mëter a despusizion dl personal nseniant l material didatich inuvatif y interatif. La Ntendënta Edith Ploner à po rengrazià duta la persones che à judà pea pra la realisazion de chësta publicazion per la bona culaburazion y l gran mpëni. Ploner à auzà ora l valor che i libri d’archeologia y l material didatich curespundënt reprejentea per la scola y la cultura ladina. La à oradechël nce sotrissà che la publicazion ie l frut dl lëur y dla culaburazion strënta danter de plu istituzions y ufizies coordinei ti ultimi doi ani da Olimpia Rasom. 

La parola ti ie depò unida data ala persones che à dantaldut laurà per la realisazion de chësc proiet: Thea Unteregger, Herwig Prinoth, Sabrina Sborgi y Monica Insam. L’autora Thea Unteregger à spligà d’avëi cialà de descrì la vita da uni di de na persona o grupa de persones dla preistoria tla valedes ladines a na maniera che i sculeies y la sculées posse se nmaginé coche l pudova vester a viver ntlëuta te Gherdëina o tla Val Badia. 

Herwig Prinoth à auzà ora che l se trata pra chisc libri de na traspusizion danter l lingaz scientifich y chël da uni di. L ie unì tlupà adum l’ultima scuviertes archeologiches y l savëi che on ncueicundì dla vita tla preistoria tla valedes ladines che ie abitedes da n 12.000 ani. “L lëur possa vester de nteres per uni persona che uel n savëi deplù sun l’archeologia o la cultura n generel”, nsci Prinoth. Sabrina Sborgi à mustrà cuncretamënter coche l liber ie struturà tlarian coche la à crià la ilustrazions y la grafica ntan che Monica Insam à sotrissà la mpurtanza dl liber nia mé per la valedes ladines, ma per duta nosta provinzia. La à oradechël purtà n valgun ejëmpli ora di glossers, de chëi che la se à cruzià, lecurdan che “l passà ne dëssa nia vester passatism”. Per finé via à Thea Unteregger, che à nce metù adum l material archeologich, nvià l publich a ti cialé y a pië ite l material didatich. I cufri possa unì mprestei ora dal personal nseniant per se n nuzé te tlas y per ti “fé deventé cuncreta la storia ai sculeies y ala sculées che possa nsci l’arziché cun la mans”. 

ir