Cialé plu inant

500 ani, 3 raions, 1 na tematica: n ucajion dla rebelions di paures dl 1525 tl Tirol storich se damanda de ndut 31 Museums: co pòssel pa garaté na bona vita per duta la jënt?

L refurmadëur soziel y cumandant di paures Michael Gaismair se ova tl 1525 damandà l dërt de co-determinazion y la valivanza per duc dan la lege. Tl 2025 ne ti dà la Euregio Tirol-SüdtirolTrentin cun l Ann Euregio di Museums na udleda de reviers nia mé ala rebelions di paures: sot al moto “Cialé plu inant” tòlela ca la ideies de Gaismair per se fé dumandes n con’ dla iustizia y dl valivamënt soziel, dl manejamënt de crises y de formes per se paré. 

Cumbater per cie pa?
L pont ulache l vën metù man a livel de reflescion ie l mudamënt radichel dla cumenanza tl 16ejim secul. N valgun museums stlarësc avisa la storia dla Vieres di Paures, d’autri se dà ju cun la curelazion nchin al didancuei. Nscila vëniel tratà formes de se paré, cunseguënzes dl culonialism storich y de ncueicundì o la dumanda de viers dla iustizia soziela. 

Linges de manifestazions y mostres se dà ju cun la ecologia te chisc tëmps dla crisa dl tlima. Pruzesc de mudamënt tecnologich y culturel stluj ju l spectrum tematich sot al moto “Cultura tl mudamënt”. 

Pluralità coche program.
30 pruiec singuli y de cuoperazion ie l zënter dl segondo ann Euregio di Museums, liei for da una na dumanda, che bele Gaismair se fajova: co pòssel pa garaté na bona vita y co pudons’a – o messons’a – nëus coche sozietà dé nosc cuntribut?

rg, tu