„Der Bauer, l paur, il contadino”

Scric en onur de n studié de Romanistica

Cun sü plü o manco 120 referac, congresc y seminars, intervënc te radio y te televijiun – por todësch, franzesc y talian – y cun sües prësc 400 publicaziuns, s’á fat Roland Bauer, filologh romanistich da Linz, n inom de prestisc ti ciamps dla geolinguistica, dla dialettometria y dla soziolinguistica. Insciö él i curadusc dla publicaziun che scrí tles prömes plates dla racoiüda de scric en onur dl professur Roland Bauer, gnüs fora en gaujiun de sü 65 agn de vita y de süa ponsiun che é danman. I 25 auturs é da tröc agn compagns y compagnes dl professur, y ti dedichëia na lignora de contribuc scric por talian, todësch y ladin. Marco Forni, por ejëmpl, te so articul “Der Bauer, l paur, il contadino” scrí sura i germanisms y les parores imprestades tl ladin de Gherdëna. 

Rolan Bauer á fat inrescida scientifica y á insigné sciöch’ professur straordinar pro le departimënt de Romanistica dl’Université da Salzburg. Dailó ál curí deplü inciaries desvalies. Y chësc spliga la pröma pert dl titul. Dal 2008 incá é Roland Bauer Diretur editorial dla rivista Ladinia, dada fora dal Istitut ladin Micurá de Rü, y dal 2023 inant fejel pert dl comité scientifich dl Vocabolar Atlant Multimedial dla cultura dialetala dla Sizilia, curé dal’Université de Palermo. Y chësta foss la cuarta pert dl titul. Ci á pa la Val d’Aosta da nen fá? De chësc y de tröp d’ater podëise lí tl liber: 

Von Salzburg über Ladinien und das Aostatal bis Sizilien (Da Salzburg tres la Ladinia y la Val d’Aosta, cina te Sicilia), olache la geolinguistica, la dialettometria y la soziolinguistica se incunta. Scric en onur de Roland Bauer, en gaujiun de sü 65 agn, a cura de Birgit Füreder, Monika Messner, Werner Pescosta, Paolo Anvidalfarei, Leander Moroder, Istitut ladin Micurá de Rü, San Martin de Tor 2024, 432 plates. 

Le liber é a osta desposiziun diretamënter te Istitut ladin Micurá de Rü, a San Martin de Tor, y te Sëlva, en Gherdëna. Al pó ince gní aposté online tres le link dl Istitut ladin Micurá de Rü Shop (micura.it) 

mac/cs