Franz Vittur pëia do le pest "Merit Ladin 2026" 

Le premié é sté le pröm intendënt scolastich ladin. Na vita al sorvisc dla scora y dla cultura ladina. 

Le secundo portadú dl Merit Ladin é tler: la iuria de esperc s’á pronunzié al’unanimité por l’ex intendënt ales scores ladines, Franz Vittur. A ti surandé le pest sará l‘assessur por la Formaziun y Cultura ladina, Daniel Alfreider. La iuria de esperc ê metüda adöm da André Comploi, diretur dl Departimënt Scora y Cultura ladina, Irene Prinoth, direturia dl Istitut Cultural Ladin Micurá de Rü, Katharina Moling, direturia dl Museum Ladin Ciastel de Tor, Denni Dorigo, diretur dl Istitut Cultural Ladin Cesa de Jan, y Paul Videsott, diretur dla Seziun ladina dla Facolté de Sciënzes dla Formaziun dla Université Lëdia de Balsan.

Te süa motivaziun alza fora la iuria de esperc: "Sciöche pröm intendënt ladin, te n momënt storich dezisif, á Franz Vittur cherié y svilupé inant les fondamëntes dl’istruziun ladina d’aldedaincö. Cun vijiun y costanza ti ál dé la dërta direziun ales strotöres dirigenziales y aministratives dla scora ladina, y á defenü cun gran convinziun le model scolastich paritetich, che vëgn odü ite aldedaincö sciöche ejëmpl por l’istruziun plurilinguala a livel internazional. Implü s’ál dé da fá te deplü manires por renforzé le lingaz y la cultura ladina y á dé n contribut concret por la sconanza di dërc dla mendranza ladina." 

L’assessur provinzial ala Formaziun y Cultura ladina, Daniel Alfreider, sotrissëia: "Franz Vittur, cun sü prësc 50 agn de presënza ativa tles istituziuns scolastiches ladines, á rapresenté n punt de referimënt sigü, frëm y competënt por döt le monn dl’istruziun y dla formaziun. Porsona ispirada, lezitënta y daverta, á Vittur dagnora chirí la strada dl dialogh y dla colaboraziun, zënza mai lascé do söi valurs dl’onesté, dla profescionalité y dl’inclujiun. Sce la scora ladina é aldedaincö l’anima y la garanzia dl’identité y dla cultura de nosta comunité, ti vá le plü gran mirit dessigü a Vittur, a chël che i ti sporji mi rengraziamënt y mia amiraziun." 

"Franz Vittur ne á nia ma daurí strades nöies te sües funziuns profescionales y istituzionales, mo al á ince porté pro ala visibilité y al aprijamënt dl lingaz ladin ince sciöche autur y protagonist cultural", injunta le diretur dl Departimënt Scora y Cultura ladina André Comploi: "Le pest reconësc la grandëza de süa opera de vita y oress ester tl medemo momënt n ejëmpl y na sbürla por l’impëgn al sorvisc dla formaziun, dl lingaz y dla cultura ladina." 

Concurs artistich Ert X Merit Ladin. Le pest Merit Ladin ti vëgn surandé ofizialmënter a Franz Vittur tla forma de n documënt rapresentatif da pert dla Provinzia da Balsan. Paralelamënter á la Lia di Artisć y dles artistes dl Südtirol metü da jí le concurs artistich Ert X Merit Ladin, en colaboraziun cun la Direziun Scora y Cultura ladina. L’opera d’ert chirida fora da na iuria de esperc gnará presentada tl cheder dl Di dla cultura ladina ai 19 de setëmber, a Urtijëi, y surandada al premié Franz Vittur.

mac/cs