Ladinia

Sun la piedies dl diare de Sissi | Ciastel de Tor da udëi coche l ie

Sun la piedies dl diare de Sissi 
L ann passà ie i locai storics dl Touriseum a Maran deventei l palch de na miscion particulera: doi dis alalongia se ài trasfurmà te n Easy Escape Room. L fin fova chël de abiné l diare perdù dl'imperadëura Elisabeta, ntan che dedora se auzova l'ega dl ruf Naif. Per ti vester cun suzes a chësta ncëria fovel debujën de n lëur de grupa, de criatività y de na mënt frëscia. I partezipanc ova nfati mé 30 menuc dl'aurela per crì la ndicazions, abiné ora i cunliamënc scundui y scuvierjer l diare de gran valor. Da dedò piova pona via la ferata che dassova mené Sissi al segur. I locai storics dl Ciastel de Trauttmansdorff ie nstësc deventei na pert dl juech, giaurian ponc de udu-da nueves y de marueia per la storia y la lerch. I partezipanc fova ntujiasmei y nscila va l'esperienza misteriëusa inant nce chëst ann.

Ciastel de Tor da udëi coche l ie
Ai 9 de mei dala 11 danmesdì possa i nteressei mparé a cunëscer l Museum Ladin Ciastel de Tor a San Martin de Tor te na maniera straurdinera coche luech da cësa vivù: ntan na raida tres i locai storics conta Irma Trebo, che stajova plu da giut tl ciastel, de si esperienzes defin persuneles. Union a cunescënza de si vita da uni di tl ciastel, ëila partësc lecorc de familia y mumënc senificatifs dajan inant ntraunides tramandedes, che ne n'ie da abiné te degun liber de storia. Ntan la raida stlarëscela la maniera de coche n se nuzova plu da giut di singui selfs y mostra coche la cunvivënza tl ciastel à caraterisà la vita da uni di. I locai da sté, i luesc ulache l univa laurà y i luesc cunesciui giaperà pruspetives nueves dla vita te chësc frabicat storich. Tres la vijita ruveràn sëura sun fac storics, lecorc persunei y n ti dajerà nce na udleda do i mures dl Ciastel de Tor. N puderà sentì l passà y l ciastel se musterà coche luegia de lecurdanza, de identità y de ncësa vivuda.

kw/gm