Medemes oportunités, te ciamp y tla vita

Giuana Prugger é alenadëssa de palé te Gherdëna, mo so tru n’é nia dagnora sté saurí. Süa storia desmostra ciodí che le respet y la valianza de tratamënt é tan importanc tl sport.

20 mitans salta sön n pre te Gherdëna. Cun i ciavëis ciolá adöm, dötes danter i set y i ot agn. Giuana storj pro n momënt ti locai da se mudé denanco les arjunje te ciamp. L’alenamënt da incö mët dant dribelnades y passaji. Chësc ann, por le pröm iade, tolará pert la scuadra dles ëres de Gherdëna a n campionat cun d’atres scuadres. Giuana, 33 agn, nasciüda y chersciüda sö te Gherdëna, soga al palé da canche ara â ot agn. Do avëi metü man tl FC Varn y tl FC dl Südtirol, l’amur por chësc sport l’á condüta a fá na esperiënza ince tl Bayern Minca y spo ti Stac Unis. Do avëi stlüt jö i stüdi te Sciënzes motories a Desproch, éra gnüda derevers te süa valada por deventé alenadëssa de palé. Mo so tru n’é nia dagnora sté saurí.

“Tl mëteman n’êl de chi che ê scetics” cuntera. Y al é na episoda che ti é re-stada ti recorc. Tl pröm ann alenâra la scuadra di mituns plü pici. “La pröma partida unse pordü sëch por 16 a 0 cuntra l’atra scuadra. N valgügn geniturs ne l’á nia tuta sö dër bun”. Ci che ara á spo messü aldí, n’é nia sté val’ che dá icoraje: “Ciodí él pa propi n’ëra che mëss alené mi möt?” o “Ci pón pa s’aspeté da na alenadëssa?” Mo la perzeziun é tosc mudada. Le scetizism inizial á dé na tria, canche an á odü ite tler che so laur n’â nia da ti invidié a chël di colegs ëi. Giuana é stada a ce dla scuadra por cin’ agn alalungia.

Le respet, por Giuana, mët man dales pices aziuns da vigni de. Promöie n comportamënt de crëta y de respet un cun l’ater ite dl grup é por ëra un di compic plü importanc de n alenadú o na alenadëssa. “Cun me á düc les medemes poscibilités da desmostré sües capazités”. Datrai sozedel che, do na pordüda, vëgn na compagna o n compagn aratá i susc responsabli. “Chësc n’á degun sëns, do mia rata”, dij Giuana. “Te chisc caji chërdi adöm döta la scuadra y i conscidrun la chestiun deboriada. Na scuadra funzionëia ma sciöche un n grup: acusé na porsona sora ne porta a nia”.

Medemes oportunités por ëres y ëi tla medema disciplina spor-tiva á por Giuana n gran valur. “I mëssi dí che, en general, mëss les ëres fá tröp deplü por ciafé la crëta. Dantadöt tles disciplines sportives dominades da ëi, sciöche le palé, é chësc ciamó plü evidënt.” Na desmostraziun é la surandada de gran pert dles scuadres ai alenadus ëi. Giuana spliga: “Gonot ti vëgn la scuadra dles ëres surandada a n alenadú che n’ess zënza albü degöna atra scuadra. Mo co pó pa les mitans avëi les medemes ocajiuns de suzes te chëstes condiziuns? Respet ó por me dí azeté vignun y vignöna por ci ch’al é. Y chësc tol ite ince le podëi se apascioné a deplü sorts de sport, zënza messëi les tlassifiché por ëi o por ëres.” Chësc contribut nasc dala scomenciadia #RESPECT dla Provinzia Autonoma de Balsan.

Ciarè l Video

so/cs