Tl sëgn ti cinch cërtli

I Jüc Olimpics da d’invern 2026 lasciará n sëgn ince dal punt de odüda cultural: UNIKA nes dá na bela desmostraziun.

"Cultural Olympiad – The Arts Programm” é l’inom dl program cultural forü y desvalí che ti fajará da cornisc ai Jüc Olimpics da d’invern Milano Cortina 2026. L'obietif é chël da trasmëte i valurs olimpics y paralimpics tres n proiet multidisziplinar che liëia cultura, tradiziun y sport, y che zelebëria la creativité sciöche lingaz universal.

L'ert nes acompagnëia dan y tratan i Jüc Olimpics ince tres la plataforma artistica UNIKA de Gherdëna. “I tulun pert ativamënter ales Cultural Olympiad di Jüc da d'invern cun dui proiec artistics” nes dij la coordinadëssa Heidi Rungger. “Nosc travert é chël da alzé fora la vitalité de nosta tradiziun dl ziplé le lëgn a man, y da dé n contribut cultural ai Jüc da d'invern.

“Wooden Fans” fans a grandëza naturala. Por l’ocajiun olimpica vëgnel indô realisé i conesciüs “Wooden Fans” te lëgn de linda: tl pröm êle cincanta scoltöres a grandëza naturala, ziplades a man dai artisć de UNIKA, che é gnüdes premiades tl 2004 cun le Südtirol Marketing Award. Por les Olimpiades da d'invern dl 2026 cheriará i artisć UNIKA cin' figöres nöies: ares rapresentará i cërtli olimpics y tl medemo tëmp les cin' valades ladines, lian adöm sport, ert y tradiziun. I modei de chëstes scultöres nöies é gnüs presentá por le pröm iade ala fiera de UNIKA, tl mëis de setëmber de chësc ann a Runcadic. Adöm cun les atres figöres ziplades, tiraráres l'atenziun dl publich tratan les gares de biathlon te Antersëlva.

La Reconziliaziun di Armin Grunt. Ince la scoltöra Reconciliaziun dl artist Armin Grunt de UNIKA fej pert dles Cultural Olympiad: n omaje simbolich ai Jüc Olimpics da d'invern. Reconciliaziun é metüda adöm da na taia doia, sëgn dla natöra y dl lian che se renovëia danter la porsona y l'ambiënt in- cëria. Incër la taia él metü sö scoltöres che rapresentëia l'energia, les vijiuns y les contradiziuns dla porsona, y che inviëia l’osservadú da se mëte söl iade, fisicamënter y simbolicamënter, por jí zoruch ales origines. L'opera gnará inaudada ai 26 de novëmber sön pla- za de Comun a Balsan, y romagnará metüda fora cina che le chentl olimpich rovará a Balsan, ai 26 de jená.

cs