Co vëniel pa lità?

Uni usc nfluenzea la vela. Ma danz mé sce chësta usc vel. Sun la plates che vën do giapëis respostes ala dumandes plu mpurtantes sun co lité curetamënter.

Chi possa pa lité? 

L dërt de lité à duc y zitadins y duta la zitadines che à arjont i 18 ani ai 22 d’utober 2023. D’autra cundizions ie la iscrizion tla listes liteles y na residënza de almanco cater ani ndolauter tla Region Trentin-Südtirol ai 23 d’agost 2023 cun domizil dantaldut tl Südtirol. 

Nce zitadins y zitadines che sta te n auter stat possa lité sce i/les à, dan che i/les viv oradecà, madurì la cundizions y sce i/les ie scric/scrites ite tl register di zitadins talians y dla zitadines talianes che viv oradecà. Chësc vel nce per si fions/fians che ie nasciui/nasciudes o che se à trasferì cun ëi/ëiles al ester y per si fëna/uem sce chisc à, tres l matrimone, giapà la zitadinanza taliana. 

Can y ulà vëniel pa lità? 

Lità vëniel ai 22 d’utober 2023 dala 7 ala 21 tla sezion litela ndicheda sun la cherta litela. 

I/La litadëures che viv oradecà dà ju si usc tres curespundënza. Nce persones cun l dërt de lité che ne ie per ntant nia tl Südtirol y che ne possa perchël nia lité te si chemun à la puscibltà de dezider sce i uel lité tres curespundënza. Te chisc caji fovel da fé na dumanda curespundënta aposta nchin ai 7 de setëmber 2023. 

Pra la vela tres curespundënza vëniel cunsià de lité riesc: la busta muessa ruvé pra l ufize litel zentrel dla Provinzia al plu tert nchin n vënerdi, ai 20 de utober. 

De cie iel pa de bujën per lité? 

Tla sënta litela muessa i zitadins y la zitadines prejenté si cherta de vela y n documënt d’identificazion. 

Chi che ne à deguna cherta de vela o che n à mé una ruineda possa giapé tl ufize litel de chemun n duplicat o na zertificazion sostitutiva. Per chësc fin ie i ufizies litei de chemun davierc ai 20 y ai 21 d’utober dala 9 ala 18 y ai 22 d’utober dala 7 ala 21. 

Sciche documënt d’identificazion vëniel recunesciù i documënc dac ora dal’aministrazion publica coche la cherta d’identità, l pas, la patent, la cherta d’ermes o l libret dla ferata, la chertes cun fotografia dates ora dala cameres prufesciuneles coche nce la chertes de recunescimënt dl’assoziazion naziunela di ufezieres de resserva y di ufizieres n pension (UNUCI - Unione nazionale ufficiali in congedo d’Italia). 

Co vëniel pa lità? 

1 N lita fajan na crëusc sun l sëni dla lista che n chier ora sun la zedula litela. 

2 Tla risses che ie dlongia uni simbol possel unì dat ju na usc de preferënza per rissa. Nchin a trëi ujes de preferënza ie lascedes pro. Per l fé muessel unì scrit l cuinuem dl candidat/dla candidata; sce l ie medemi inuemes muessel nce unì scrit l prim inuem o l luech o la data de nasciuda per stlù ora melntëndimënc. 

L ne ie nia plu puscibl dé ju na usc de preferënza tres l numer de lista dl candidat o dla candidata. La ujes de preferënza possa mé unì dates ju per persones che fej pert dla lista pra chëla che n à metù la crëusc. Sce no ie la usc de preferënza zënza fazion. 

red