Cumpedada di grups linguistics online é piada ia

La cumpedada anonima di grups linguistics por relevé le “proporz” vëgn fata por le pröm iade ince online y despartida dala cumpedada dla popolaziun.

Tan de posć tl’aministraziun publica y tan de mesi finanziars che al ti speta al grup linguistich ladin, todësch o talian depënn dal insciödit “proporz” – le raport porcentual di grups linguistics. Chësc vëgn relevé tres la cumpedada anonima di grups linguistics. Aladô dl Statut d’autonomia é le proporz la fondamënta por l’assegnaziun di posć publics y la composiziun di organs aministratifs y politics. En chësc ann vëgn la cumpedada di grups linguistics tignida por le pröm iade digitalmënter y despartida dala cumpedada dla popolaziun. Al vëgn “cumpedé” döta la popolaziun che â ai 30 de setëmber dl 2023 süa residënza tla provinzia de Balsan. Les porsones sot ai 18 agn vëgn sostignides da sü geniturs o da che che eserzitëia por ëres la responsabilité da genitur. La cumpedada digitala é piada ia al 4 de dezëmber. Les zitadines y i zitadins pó detlaré online süa portignënza o agregaziun a un di trëi grups linguistics. Por chësc fin vál debojëgn de na identité digitala (Spid), na cherta de identité eletronica o na cherta di sorvisc. Da dötes les porsones che ne dá nia jö la detlaraziun online gnarál tl scomenciamënt dl ann nü te ciasa n funzionar o na funzionara a fá le relevamënt.

jw/uv