Les liëndes ladines Patrimone cultural imaterial

Les liëndes ladines dess deventé Patrimone cultural dl’Unesco. Le pröm vare da fá é chël dla creaziun de n archif digital.  

Dl 2009 é les Dolomites gnüdes detlarades Patrimone natural dl’umanité UNESCO, y les liëndes dles popolaziuns che vir te chisc raiuns dess tosc deventé Patrimone cultural imaterial. Les liëndes ladines é n’arpejun che vá zoruch de cënc y cënc de agn. Sce an baia de Dolasila, dla Gana de Pöz, dl’araldora dl Saslunch, di Crëps stlauris, spo podarunse tosc ciafé dötes chëstes informaziuns te n archif digital. “L’archif á la finalité da registré y tigní sö le patrimone cultural imaterial ladin, y al sará la testemonianza dla vitalité dles liëndes che á ciafé y che ciafa tres indô süa espresciun tla leteratöra, tl’ert figurativa, tla musiga y te d’atres formes de imaginaziun coletiva” dij le coordinadú dl proiet, Carlo Suani. 

Le professur Pier Luigi Petrillo, dl’Université Unitelma de Roma, á tles mans le proiet de candidatöra dles liëndes ladines a patrimone cultural imaterial dl’Unesco y al é tl porté inant so laur tl respet de düc i criters, ziti y rigorusc, che la cossa se damana. 

“Les liëndes ladines porta adöm nia ma les valades dl raiun dolomitich, mo ince d’atri posć che partësc le medemo patrimone linguistich y cultural, sciöche le Friuli Venezia Giulia y i Grijuns” nes spliga l’assessur por la Formaziun y la Cultura Ladina, Daniel Alfreider. “Le reconoscimënt de nostes liëndes sciöche patrimone cultural imaterial foss dër important, deache al rapresentass n’atra desmostraziun dla gran valüta dla cultura y dl lingaz de nosta mendranza ladina”.

san/red