Lijëndes ladines y l recunescimënt coche arpejon culturela Unesco

I crëps linëusc, l Rëni de Fanes, la prinzëssa Dolasilla, Rë Laurin y si Ciadenat: cieche la Dolomites ie bele, dëssa nce deventé la lijëndes di ladins

De tan inant che ie l iter n con’ dla candidatura dla lijëndes ladines coche arpejon culturela imateriela Unesco à rujenà de mei l prufessëur Luigi Petrillo dla Università Unitelma Sapienza de Roma y l assessëur provinziel ladin Daniel Alfreider tl Ciastel de Tor. 

Tl 2022 se ova la Uniun di Ladins dla Val Badia mbincià che la lijëndes unissa valurisedes aldò de chël che les se merita. La lijëndes ie bele testemuniedes dai seculi incà tla Dolomites. Les nfluenzea nscila da zacan incà la cultura, l carater, la vijion dl mond y truep aspec dla vita da uni di di ladins. La lia culturela ova sun chëla tëut su cuntat cun l assessëur provinziel cumpetënt Daniel Alfreider y l assessëur regionel Manfred Vallazza. Cun Luigi Petrillo, un di majeri esperc per candidatures Unesco a livel nternaziunel, iel unì abinà n partner scialdi cumpetënt. Petrillo se à dit a una de cuordiné l pruiet. cialan danora de determiné che l fossa danman criteres assé per na candidatura. D’ansciuda dl 2023, à la Region Trentin-Südtirol y la Provinzia de Bulsan dat pro l pruiet de nrescida, nsci che n à bele scumencià a lauré d’autonn dl 2023.  

Danter l auter iel unì damandà ora persones che possa mustré su y desmustré coche la lijëndes ladines sibe n elemënt vif y atif dla cultura y dla identità dla populazion ladina. Da coche à sotrissà Petrillo ie da si pont de ududa la cossa plu mpurtanta che propi tres films y ciaculedes cun la jënt ladina fóssel unit ora te na maniera tlera la mpurtanza dla lijëndes. Duta la jënt damandeda ora dëssa avëi dat cunfërma che la ova audì cuntan la lijëndes da si aves y nëinesc y da si peresc y umans y che chësta lijëndes fej ora na pert sota y autentica de si perzezion y de si sentimënt ladin.  

L assessëur Alfreider à auzà ora dut si gran respet per l lëur fat nchinamò. N mumënt mpurtant ie stata la sotscrizion dl decret per fé l nventar dl’arpejon culturela imateriela di Chemuns ladins de Südtirol tres l assessëur provinziel. N nventar che l manciova mo te Südtirol, ma che va debujën per la candidatura. Tlo laite saràl duta la formes de esprescion culturela imateriela: savëi pratich-tecnich, artejanat, crëidum populer, rituai religëusc, ert figurativa. L troi sun chël che n à scumencià a jì porta nscila bele fruc mpurtanc.  

dl