Miurà segurëza per streda

A Picolin tla Val Badia segurea njins nueves la streda: rëies, rëms y n mur ie jic debujën, ajache i lëns ne fajova nia plu l fat y sie, do l mpestamënt tres l chëifer dala scorza.

Rëies do l mpestamënt tres l chëifer dala scorza tla Val Badia. Doi rëies sun de gran sperses, cater de gran rëms y n mur segurea damoinla mo miec contra sasc la streda statela dla Val Badia dlongia Picolin. L ntervënt ie jit debujën do la nfezion sterscia di lëns tres l chëifer dala scorza. Bele truep lëns se ova sturcià. "Oradechël se à la situazion piurà dassënn do i temporai dl instà dl 2023," da coche à dit l respunsabl per la pruzedura di ntervënc David Ziller.  

L Servisc dla Stredes y la Repartizion provinziela de frabicoz sot a tiera ite à rumà su a puntin la lueges plu zities di ronesc. "Sëura la streda su iel unì tëut demez duta la plantes per na rissa de 30 metri lergia, dessot àn tëut y tres i lëns mpestei dal chëifer dala scorza," stlarësc Ziller. Da dedò iel unì nvià via i ntervënc per i njins de segurëza, nce n cunlaurazion cun i Ufizies provinziei per Geologia y Bòsc. "Tres l ntervënt deberieda sons stac boni de ti garantì na majera segurëza a chiche furnea iló sun chël tòch de streda, cieche ie fundamentel per garantì che n posse furné ite y ora tla Val Badia sun chësta streda," da coche dij l assessëur per la mubltà Daniel Alfreider. I lëures per seguré l rone jirà inant per dut l 2024 cun plu ntervënc

san/dl