Proiet Pilot tl ITE Raetia

Furmé studënc scialdi boni y sportifs scialdi boni

Tl Istitut Tecnich Economich ITE Raetia de Urtijëi scumenceràl tl ann de scola 2024/2025 n pruiet inuvatif y speziel. L ITE Raetia de Urtijëi, che ie bele spezialisà tl sport da d’inviern coche sëul Ski College de dut Südtirol, possa mustré su n var inant, suvier, te si ufierta de sport. Plu sortes de sport va ite tl cuntest furmatif pità dal ITE: tennis, juech dala codla y hockey ie l nuef dl daunì dla scola de Gherdëina. Te tramedoi sezions, chëla de Marketing y chëla de Turism, vëniel metù a jì n nseniamënt che lasce nce pro de ti jì do al sport.

Cun n cunzet nuef logistich y urganisatif se à l ITE Raetia giaurì chiran de si bona la cunlaurazion cun duta la sozieteies dal sport de Gherdëina. Cun scumenciamënt dl ann de scola 2024/2025 possa la jëunes y i jëuni dla sozieteies dal sport che fej pea pra chësc pruiet fé alenamënt cun si lia doi iedesc al’ena danmesdì, zënza lascé da na pert la furmazion de scola. De gra al sustëni dla Ntendënza Scolastica Ladina puderàn scumencé cun l proiet d’autonn dl 2024 tla tlasses primes y segondes, cun almanco sies jëunes y jëuni al ann nteressedes/nteresseia ti jì do a si nteres sportif, per jì inant nchin al ann dl ejam de maduranza. 

L pruiet se taca dantaldut ite ala jëunes y ai jëuni che ie scrites y scric ite te na lia dal sport che fej pea, che ie al mumënt l FC Gherdëina, l HC Gherdëina, l Tennis Club Gherdëina, l Tennis Club Urtijëi y l Iceclub Gherdëina, y che uel ti jì do a si pascion per l sport cun si cumpanies tla vita y tla lies, zënza perchël messëi renunzië a na furmazion de scola de cualità scialdi auta, tl Istitut Tecnich Economich ITE Raetia, scola paritetica cun duta trëi la rujenedes provinzieles: ladin, talian y tudësch. Oradechël pòssel tlo fé pea nce studëntes jëunes y studënc jëuni de lies dal sport di chemuns ntëurvia.

A una cun i trainadëures dl club, aldò dla dumanda dla lia dal sport o ntan la enes te chëles che l ne n’ie nia mesun fé alenamënc spezifics per n valguna sortes de sport per gauja dl tëmp, mët la scola a jì sëuraprò uniteies de alenamënt mentel, uniteies furmatives de nutrizion dal sport, training funziunel y n.i.. 

Sce la sculées y i sculeies dla scoles autes messova ti ani passei n pert renunzië a si atività sportiva ajache i mpënies, la struturazion y la logistica puech flescibla de scola ne la lasciova nia pro o, mo piec, sce la sculées y sculeies ne ti dajova nia l drë’ pëis ala scola, tralascian si mpënies y ncëries de furmazion pur de ti jì do a si pascion dal sport, à ntant l ITE Raetia abinà na streda per mëter adum sport y scola, che se renfurzea un cun l’autra. Valores coche l’artenienza, la pascion, la disciplina y l mpëni che fej ora la cuintessënza dl sport vën sustenii nce dala scola che uel furmé studënc scialdi boni y sportifs scialdi boni. 

dl