Vari concrec por les rodes söi jus

Da n ann incá esistel percursc dedicá ai ziclisć sön dui jus dolomitics. De d’atri nen gnará plü inant.

Dan da prësc n ann esi gnüs inaugurá i prüms percursc por les rodes söi jus dl Sella y de Frara. “Chësc proiet pilot á porté pro a tröpa segurëza por i ziclisć, mo ince por i atri anuzadus dla strada, y á fat aumenté le numer de porsones che vá söi jus cun la roda” dij Daniel Alfreider, assessur provinzial por la mobilité.

Chisc percursc por ziclisć é striares de segurëza resservades ales rodes, y ares é despartides dala striara normala che porta söi jus. La realisaziun dles striares é gnüda regolamentada dala lege söla costruziun dles strades aprovada dala Provinzia tl mëis de jená dl 2022. Le fi n dl proiet ê chël da daidé n grüm de porsones da renunzié al auto privat y da se möie cun la roda.

Do da n ann podunse dí che i resultac é positifs: i percursc resservá ales rodes é gnüs tuc sö dër bun da pert di ziclisć, y chësc á porté pro da programé intervënc de costruziun y de ampliamënt di percursc ince por chësc ann. Tl monü, se trátera dla Strada Statala nr. 242 che condüsc söl Ju dl Sella, olache la striara por les rodes gnará arlungiada de n chilometer. Na striara por les rodes gnará realisada ince sön la strada che porta al Valparola, por na lunghëza de 1,5 chilometri. La gara d’apalt por chësc laur dess gní incündada bele chësc ann. Sciöch’ l’assessur Alfreider á dit, les striares por les rodes gnará realisades ince sön les atres strades di jus, tan inant che al sará poscibil.

Les striares por les rodes é n proiet pilot por la creaziun de n raiun cun emisciuns basses, tan co de n raiun cun püch incuinamënt incër les Dolomites. “La situaziun dla mobilité tles Dolomites se damana na soluziun globala y transnazionala” sotrissëia Alfreider. Sëgn esun tl laur da damané che al vëgnes dé pro mesüres speziales da pert di ministers competënc a Roma.

pt/san/cs